لائحة 'نبض البلد' تطلق لائحتها بمهرجان شعبي حاشد

أطلقت لائحة "نبض البلد" للانتخابات البلدية لائحتها في مهرجان شعبي حاشد أقيم في موقف الزعتري في صيدا.

حضر المهرجان أمين عام التنظيم الشعبي الناصري النائب الدكتور أسامة سعد، وفاعليات سياسية واجتماعية وثقافية، وحشد كبير من أهالي مدينة صيدا ومن الشباب.

بدأ المهرجان بالنشيد الوطني اللبناني .. ثم  كانت كلمة للناشط محمد قانصو، قال فيها:

أولاً لان لي بجرب مجرب بكون عقله مخرب..

وثانياً لأن اذا صيداً بدها لازم المرشحين يكونوا فعلاً قدها.
شو يعني قدها؟ 
يعني لائحة تشكلت ضمن معايير ومواصفات جدية مش على طريقة هات ايدك والحقني.
يعني لائحة بتضم ناس من خيرة شباب وصبايا البلد وبمختلف الفئات العمرية، 
شغلهم وتضحياتهم بعرفوا عنهم، 
وسابقهم مش ناطرين يوصلوا على البلدية ليقدموا لمدينتهم صيدا أحلى مدينة بلبنان.
يعني لائحة المرشحين لي عليها بتنتخبهم وين ما كانوا نازلين، 
كيف اذا انجمعوا بلائحة وحدة برئاسة الوفي لمدينة صيدا، 
الادمي والخلوق محمد دندشلي أبو سلطان، 
مع فريق عمل كفوء ومتجانس حامل مشروع ورؤية واضحة بترد لصيدا نبضها،  وبتنقل المدينة نقلة نوعية.

والأهم من هيك انه فريق عمل اللائحة مش طمعان بمنصب أو بكرسي
وما عمل shopping  لوائح ولا رئيس اللائحة عم يعمل shopping أصوات.
الأهم من هيك انه فريق عمل مدرك للتحديات لي عم تعيشها المدينة 
وعنده رؤية واقعية لكيف ممكن تكون الحلول عملية على المدى القصير 
واستراتيجية مستدامة على المدى الطويل.

ثم جرى التعريف بأعضاء لائحة "نبض البلد" وهم: محمد محمود الدندشلي، رامي رفيق بشاشة، بسيمة نجيب السن، أحمد محمد ضاهر، ميسون أحمد زهرة، كريم عبد الحليم الزين، أية عبدالباسط البلولي، حسن عدنان بديع، غنى رشيد وهبي، تيسير بلال الزعتري، عفاف احمد البابا، محمد كمال حنينة، مجيد عبدالجواد، لينا الياس العلم، محمد حفظي مصطفى كمال المجذوب، مزين ناصر الصباغ، مصطفى أحمد البزري، ايمان محمود بطاح، إبراهيم حسن حجازي، يمنى جان نصار، أحمد رامز عسيران.

وتبعها كلمة لرئيس اللائحة المهندس "محمد دندشلي" قال فيها:

مساء الخير يا أحبائي…

أستذكر روح أخي المرحوم مصطفى محمود الدندشلي… وأوجه له التحية… التحية لروحه، وأنا متأكد أن روحه معنا تحمي مدينة صيدا بكل عاطفة…
التحية لزوجته السيدة زهرة بشاشة الموجودة بيننا…
التحية لكل إخواني وأصدقائي وخاصة الدكتور أسامة سعد…

مساء الخير يا أحبائي، يا أهلي ويا أصدقائي… يا نبض هالمدينة…

من هون… من أمام بحر صيدا… من القلوب يلي تعبت من المعاناة، وعم تصبر… جايين نعلن اليوم صوت التغيير… صوتكم… جايين نعلن لائحة "نبض البلد"…

وجودكم اليوم، وهذا الحشد الذي يكبر القلب، دليل على أنو صيدا قادرة تحلم وتشتغل لتخلي صيدا من أحلى المدن على الساحل اللبناني…

اليوم جايين نقول بصوت عالي:
"البلدية مش ملك حدن… البلدية للناس… البلدية لكم!"

صيدا مدينة كبيرة بأهلها، بتاريخها وحضارتها، فريدة بحاراتها، بأزقتها، ببحرها، بأسواقها… بانتمائها وتضحياتها…

صيدا كبيرة فيكم - بسواعدكم، وتصميمكم على البناء وحب الحياة…
بس للأسف، صيدا اليوم مهمشة، متروكة للفوضى، محطوطة على الرف، منسية…

لكن نحنا جايين معكم، ومن خلالكم لنقول: "كفى!"
كفى فوضى، كفى صفقات، كفى زبائنية… كفى محسوبيات… كفى…

نحن جايين نرجع كرامة الناس لأهلها… ونفتح أبواب البلدية لكل صيداوي وصيداوية… وليعرف القاصي والداني أننا "نحن مش مرشحين سلطة"… نحنا مرشحين لنتحمل المسؤولية شاء من شاء وأبى من أبى… وسنحملها مهما كانت العواقب…

نحن من الناس… من قلب الشارع… من السوق… من الصيادين… من البساتين… من الحرفيين… من المعلمين… من الشباب والصبايا يلي بدن يعيشوا بمدينة بتشبهن وبتحترمن…

مشروعنا مش ورقة… مشروعنا مش كلام مصفوف… مشروعنا خطة واضحة، أنتم عنوانها وهدفها وأساسها النهوض بالمدينة…

- تنظيم واقع النفايات والمولدات أولاً
- تنظيم الأملاك البحرية وحسن استثمارها ثانياً
- تنشيط المرفأ واستعمالاته ثالثاً
- تفعيل المدرسة والملعب والحديقة والشارع والرصيف…

ومشروعنا الأساس إعادة القرار للناس…

إخواني وأهلي وأحبائي…

"الناس بدها شغل مش واسطة… بدها كرامة مش مِنّة وإحسان من حدا… علينا أن نوفر لها مصادر العمل… وفرص العمل ومجالات العمل، وهي كثيرة في المدينة…
نحن لسنا حملة انتخابية… نحن حركة ناس…
نحنا عنوان حملتنا عدالة توزيع الخدمات بين كافة شرائح مدينة صيدا…

ومن هون، من صيدا… من الأرض المليئة بالحكايات… منكم… من تعبكن… ومن وجعكن… ومن أحلامكن…

منقول بصوت واحد ومرتفع:

"صيدا مش للبيع… ومش رح نسكت بعد اليوم! صوتنا عالي ورح يضل عالي بفضلكم وحضوركم وإصراركم…"

لأنو نحنا ما منشتغل إلا للناس… وما منحكي إلا باسم الناس…

"يا صيدا… خلي صوتك يحرر البلدية من الوصايات والتوصيات!"
صوتكم هو القرار… وصوتكم هو التغيير! بدنا التغيير الآن… وقد حان وقت التغيير…

أحبائي…
مع بعض، فينا نرجع النبض لهالبلد…
مع بعض، منكتب صفحة جديدة لصيدا…
نبض البلد… هو نبض الناس… هو نبضكم…

وبـ 24 أيار، بدنا نسمع صوتكم يهدر بسما صيدا…

التغيير لصيدا… التغيير لصيدا… التغيير لصيدا…

ورافق مهرجان إطلاق لائحة "نبض البلد" مسيرة بحرية للصيادين حملوا خلالها أعلام اللائحة والأعلام اللبنانية، في تحية منهم لأعضاء اللائحة.